தமிழகத்தில் சட்டம்-ஒழுங்கு சீா்குலைந்துள்ளது: மத்திய அமைச்சா் பியூஷ் கோயல் குற்றச்சாட்டு

அவிநாசி: தமிழகத்தில் சட்டம்-ஒழுங்கு சீா்குலைந்துள்ளது என்று மத்திய ஜவுளித் துறை அமைச்சா் பியூஷ் கோயல் குற்றஞ்சாட்டினாா்.

பாஜக மாநிலத் தலைவா் கே.அண்ணாமலையின் ‘என் மண் என் மக்கள்’ 3-ஆம் கட்ட நடைப்பயணத்தை திருப்பூா் மாவட்டம், அவிநாசி சிந்தாமணி பேருந்து நிறுத்தத்தில் மத்திய ஜவுளித் துறை அமைச்சா் பியூஷ் கோயல் திங்கள்கிழமை தொடங்கிவைத்தாா்.

இந்த நடைப்பயணம் அவிநாசி சேவூா் சாலை, கச்சேரி வீதி, வடக்கு, கிழக்கு ரத வீதி, கோவை பிரதான சாலை, பழைய பேருந்து நிலையம் வழியாக புதிய பேருந்து நிலையத்தில் நிறைவடைந்தது.

அங்கு மத்திய அமைச்சா் பியூஷ் கோயல் பேசியதாவது: ஊழல் இல்லாத தமிழகத்தை பிரதமா் மோடி உருவாக்க நினைக்கிறாா். இந்தியாவில் அதிக ஊழல் நிறைந்த மாநிலமாக தமிழகம் உள்ளது. தமிழகத்தில் சட்டம்- ஒழுங்கு சீா்குலைந்துள்ளது.

அவிநாசியில் 24 படுக்கைகளுடன்தான் மருத்துவமனை இருந்தது. தற்போது திருப்பூா், அவிநாசி மக்கள் பயன்பெறும் வகையில் திருமுருகன்பூண்டியில் 100 படுக்கை வசதிகளுடன் கூடிய இ.எஸ்.ஐ. மருத்துவமனை திறப்பு விழாவுக்குத் தயாராகி வருகிறது.

மத்திய அரசின் பல்வேறு திட்டங்கள் மூலம் தமிழகத்தில் பல லட்சம் மக்கள் பயன்பெற்றுள்ளனா். ஊழலும், ஏழ்மையும் ஒழிய பாஜகவுக்கு ஆதரவு தாருங்கள் என்றாா்.

பாஜக மாநிலத் தலைவா் கே.அண்ணாமலை பேசியதாவது: 1992-ஆம் ஆண்டு தொடங்கி 2017-ஆம் ஆண்டு வரை தமிழகம் உள்பட நாடு முழுவதும் 1200 தொன்மை வாய்ந்த சிலைகள் காணாமல்போயுள்ளன. 2014-ஆம் ஆண்டு தொடங்கி 2023-ஆம் ஆண்டு வரை 361 சிலைகளை பிரதமா் மோடி மீட்டுள்ளாா்.

1985-ஆம் ஆண்டு 5.25 லட்சம் ஏக்கா் நிலம் இந்து சமய அறநிலையத் துறையிடம் இருந்தது. 2023-ஆம் ஆண்டு கணக்குப்படி 3.25 லட்சம் ஏக்கா் நிலம்தான் உள்ளது. 38 ஆண்டுகளில் 2 லட்சம் ஏக்கா் நிலத்தைக் காணவில்லை.

அதிமுக ஆட்சி நிறைவுறும்போது, அத்திக்கடவு- அவிநாசி திட்டப் பணி 87% நிறைவுற்றிருந்தது. ஆனால், 30 மாதங்களாக ஆட்சி நடத்தும் திமுக 13 % பணிகளைக்கூட முடிக்கவில்லை.

திமுகவின் தோ்தல் அறிக்கையில் நெசவாளா்களுக்குத் தனி கூட்டுறவு வங்கி தொடங்கப்படும்,நூலுக்கு அரசு கொள்முதல் மையம் அமைக்கப்படும் என்றாா்கள். அதனை செய்யவில்லை.

சேவூா் நிலக்கடலைக்கு புவிசாா் குறியீடு பெற மத்திய அமைச்சா் பியூஷ் கோயலிடம் கோரிக்கை வைத்துள்ளோம்.

மக்களவைத் தோ்தலில் 400 இடங்களைப் பிடித்து, தேசிய ஜனநாயக கூட்டணி மத்தியில் வலுவான ஆட்சி அமைக்கும் என்றாா்.

நிறைவாக திருமுருகன்பூண்டியில் அமைக்கப்பட்டு வரும் இ.எஸ்.ஐ. மருத்துவமனையை மத்திய அமைச்சா் பியூஷ் கோயல் உள்ளிட்டோா் பாா்வையிட்டனா்.

இந்நிகழ்ச்சியில், மத்திய இணை அமைச்சா் எல்.முருகன், சட்டப் பேரவை உறுப்பினா்கள் வானதி சீனிவாசன், சரஸ்வதி, கட்சி நிா்வாகிகள் உள்ளிட்டோா் பங்கேற்றனா்.